புதிதாகத் தொடங்கப்பட்ட பாடப்பிரிவுகளான புவியியல், புவிஅமைப்பியல் மற்றும் புள்ளியியல் துறைகளுக்கு, தமிழ், வரலாறு, பொருளியல், இயற்பியல், தாவரவியல், கணிதம் ஆகிய துறைகளில் காலியாக உள்ள பணியிடங்களிலிருந்து ஆசிரியர் பணியிடமாற்றம் செய்யப்பட்டு, ஏற்கெனவே பணிபுரிந்து வரும் 7 கௌரவ விரிவுரையாளர்கள் தவிர மேலும் 10 ஆசிரியர்கள் கல்வித் தகுதியின் அடிப்படையில் நியமிக்கப்பட்டுள்ளனர். இதற்கான ஒப்புதலை பொதுக்குழுவிடம் வேண்டுகிறோம்.

ஒவ்வொரு ஆண்டும் ஜனவரி மாதம் வழங்கப்படும் ஊதிய உயர்வின்படி, 2025–2026ஆம் ஆண்டில் கௌரவ விரிவுரையாளர்களாகப் (14 பேர்) பணிபுரிபவர்களுக்கு குறைந்தபட்ச மதிப்பூதியமாக ரூ. 10,000/‑ம், நீண்டகாலமாகப் பணிபுரியும் ஒருவருக்கு மட்டும் ரூ. 11,000/‑ம், தூய்மை பணியாளர்கள் (17 பேர்) ஒவ்வொருவருக்கும் ரூ. 1,000/‑ம், சம்பளம் மற்றும் வங்கி தொடர்பான பணிகளை மேற்கொள்ளும் அலுவலக பணியாளருக்கு ரூ. 1,000/‑ம் உயர்த்தி வழங்கிடவும் இப்பொதுக்குழுவின் அனுமதி வேண்டப்படுகிறது.

தென்மேற்கு பருவமழைக்குப் பின் 26 ஏக்கர் வளாகத்தில் ஏற்பட்ட களைச்செடி ஆக்கிரமிப்பு, மேடுபள்ள நிலப்பரப்பு, மற்றும் நீர்த்தேக்கத்தால் ஏற்பட்ட சுகாதாரச் சிக்கல்களை தூய்மை பணியாளர்கள் கடின உழைப்பால் சரிசெய்து, துறைகளுக்குச் செல்லும் பாதைகளை பயன்பாட்டிற்கு ஏற்றவாறு அமைத்த அவர்களின் அர்ப்பணிப்பை அங்கீகரிக்கும் வகையில், ஆட்சி மன்றக் குழுவின் ஒப்புதலுடனும் செயற்குழுவின் முடிவின்படியும் அவர்களது ஜனவரி மாத ஊதிய உயர்வு டிசம்பர் மாதமே முன்கூட்டி வழங்கப்பட்டது.

பெற்றோர் ஆசிரியர் கழகத்தின் நிதி ஆதாரமான மாணவர் சந்தாத் தொகையை, தற்போதுவரை சேர்க்கை ஆண்டில் மட்டும் பெற்று வந்த நிலையிலிருந்து எளிமையாக்கி, ஆட்சி மன்றக் குழுவின் பரிந்துரை மற்றும் செயற்குழுவின் முடிவின்படி இளநிலை இரண்டாம் மற்றும் மூன்றாம் ஆண்டு மாணவர்களிடமிருந்து தலா ரூ. 700/‑ம், முதுநிலை இரண்டாம் ஆண்டு மாணவர்களிடமிருந்து ரூ. 1,000/‑ம் கூடுதலாகப் பெற்றுக்கொள்ள இப்பொதுக்குழுவின் ஒப்புதல் வேண்டப்படுகிறது.